Кадиица и Лута

Еднодневна, релативно лесна акција на 31.3.2019 (недела), на двата централни врвови на планината Бабуна – Кадиица (1430 м.н.в.) и Лута (1500 м.н.в.), од каде што се протега прекрасен поглед на Пелагонија.

Се поаѓа од селото Ораов Дол (500-550 м.н.в.) по делумно обележана патека до месноста Момин Вир (700 м.н.в.) каде што има прекрасни слапови на реката Брезица. Оттаму преку Осојница и Трештеник, по не толку видлива патека (на одредени места воопшто и нема да се оди по патека) планирано е да се отиде прво на врвот Кадиица (времетраење на искачувањето од околу 2 часа), а потоа доколку има време и услови и на соседниот врв Лута кој е оддалечен половина час. Враќањето ќе се одвива преку изворишниот дел на реката Брезица и по сртот од нејзината десна долинска страна при што се поминува низ предел со прекрасни камени форми.

Вкупната должина на патеката во двете насоки изнесува 13-14 км.

За подетални информации за овие предели, погледнете ги претходните акции на планинарското друштво. Извештајот од 2015 година може да се види тука.

Тргнување од Скопје во 5.00 на бенизнската пумпа Макпетрол на источниот излез. Ќе може да се договори и попатно собирање на учесниците.

 

ПОТСЕТУВАЊЕ ЗА:

– облека – соодветна за движење во пролетни услови, без многу снег, но со променливо време и влажен терен;

– вода – добро е да се понесе барем 1 литар вода;

– цена – 500 денари.

 

ПРИЈАВУВАЊЕ:

Велимир Граоркоски  071 564-458 / veljogr@yahoo.com

 

НАПОМЕНА:

– секој учесник е должен да ги почитува правилата и насоките на водачите, во спротивно сам е одговорен за несаканите последици;

– движењето се одвива во група предводена од организаторот и водачите;

– водачите имаат право да исклучат учесник уште пред стартот на планинарската акција доколку не ги исполнува наведените услови и не ја поседува соодветната планинарска опрема за предвидената планинарска акција;

– водачите имаат право да исклучат учесник од групата поради непримерно однесување (загрозување на општата безбедност и нарушување на животната средина);

– водачите го задржуваат правото на измени на терминот и текот на акцијата во зависност од временските услови или влијанија од друга природа.

Родители и деца во епизодата: Суперхерои на Попова Шапка (27.1.2019)

Нашата суперхеројска акција претрпе измени! Нашите Суперхерои се ангажирани да обучат нови идни Суперхерои на нови вештини и моќи на Попова Шапка во Зимската Школа за Суперхерои во недела (27.1.2019). Затоа ја менуваме локацијата на акцијата на ПОПОВА ШАПКА и за нашите најмали Суперхерои и се вклучуваме во мини Суперхеројско училиште.

Опис на акцијата: Суперхерој е човек кој поседува натприродни или супер-човечки моќи, посветен на победата на доброто над злото во Универзумот, заштитник на луѓето, сите живи суштества и природата.

Под Конаците на Попова Шапка, на оваа супер-акција ќе ги запознаеме нашите Суперхерои: Супер-Маркацист, Супер-Планинар, Супер-Тркач, Супер-Качувач и Супер-Спасувач кои ќе ги претстават нивните супермоќи и супер-орудија. Тие ќе не научат како да се движиме по снег, со супер-стапчиња, ќе допреме со прстињата супер-боцки на супер-дерези, ќе видиме преостар супер-цепин, и ќе ни покажат како со помош на едни широоооки, шарени, пресмешни додатоци наречени супер-дрезги добиваме супермоќ да можеме да се движиме без да пропаѓаме во прееееедлабок снег. Оти кога ќе пораснеме и ние ќе бидеме Суперхерои! Со супер-појаси и супер-шлемови!

Потоа ќе направиме супер-колона и ќе научиме супер-јазли со едно суперхеројско јаже и сите заврзани на јажето малку ќе планинариме па се до хотел Арена каде ќе ги стоплиме рачињата и ножињата покрај оганче.
Таму ќе играме игри и ќе ги повторуваме супер-орудијата и супер-јазлите. Со мнооогу супеееерхеројски стикери и бонбони.

Дотогаш нашите Суперхерои ќе направат зимско супер-засолниште, а ние, откако ќе го погледнеме и провериме, ќе кажеме дали иглото е суперхеројско и дознаеме што е она сребреното во кое Суперхероите личат исто како наградните бонбончиња.

И тука нашата прва мини суперхеројска обука доаѓа при крајот 🙂

Локација и време: Падината под Конаците и под хотел Тетекс/Арена на Попова Шапка во 09:00 часот

Напор: Супер-лесна, прилагодена на способноста на најмалите Суперхерои.

Времетраење на супер-акцијата (вкупно): 6 часа

Задолжителна опрема за Суперхерои на снег:
• Супер-Планинарски СУПЕР-ВИСОКИ супер-топли чевлички или супер-чизмички (никако патики)
• Супер-топла непамучна облека соодветна на времето, супер-топла јакничка и панталончиња, оделца за скијање, супер-дебели чорапчиња, неколку пара во ранче, супер-волнено капче, супер-шалче, 2, 3 пара ракавички (водонепропустливи по можност), ОБЛЕКА ЗА ПРЕСЛЕКУВАЊЕ, наочарчиња за сонце (ако бидат потребни)

Храна за Суперхерои: Од ранче. Вода, топли напитоци,1л.

Планинарски водичи: Ирена Диков, Љубица Матевска, Стојан Хаџи-Јевтимов, Велимир Граоркоски

Превоз: Со сопствени возила или организиран превоз со поаѓање пред Пошта 2-Железничка станица во 07:00 часот

Цена за организиран превоз: 400 денари

Пријавување: ЗАДОЛЖИТЕЛНО без разлика дали доаѓате со сопствено возило или организиран превоз, најдоцна до 25.01.2019, петок

Лица за контакт: Ирена Диков 070 325 618, Љубица Матевска 071 390 626, Стојан Хаџи-Јевтимов 078 315 213, Велимир Граоркоски 078 260 617

Напомени:

• Во случај на неповолни временски услови акцијата навреме ќе биде откажана
• Учесниците во акцијата се должни да ги почитуваат насоките на водичите. Во спротивно самите се одговорни за несаканите последици.
• Водичите имаат право да исклучат учесник/-ци на акцијата на почеток или во текот на акцијата доколку не ги почитуваат објавените насоки, не ја поседуваат соодветната планинарска опрема и не ги почитуваат насоките на водичите.
• Водичите го заддржуваат правото на промена на условите на објавената акција согласно условите на теренот.

Дерза 20.10.2018

Дерза 20.10.2018

Поради тоа што постоеше интерес за претходно откажаната акција на врвот Дерза, одлучено е повторно да се закаже акцијата пред да се влошат временските услови.

Технички податоци:  1500 м D+, должина на патеката 17 км. во двете насоки.

Опис на патеката: Се поаѓа од с. Тануше (1200 м.н.в.), најпрво кон платото пред Три Синори (2061 м.н.в.), а потоа на север кон врвот Дерза (2403 м.н.в), при што се поминува под врвовите Шуплив Камен (2431 м.н.в.) и Црн Камен (2400 м.н.в.). Последните педесетина метри се технички, се поминува по ронлива карпа, со поголеми бездни од двете страни. Враќањето ќе се одвива по патеката по текот на Рибничка Река.

Тежина: Акцијата е класифицирана како тешка и за истата е потребна одлична психофизичка подготовка. Не е предвидена за планинари почетници и за оние кои имаат фобија од височина. Во најголем дел движењето ќе се одвива по беспатје.

Времетраење на акцијата (вкупно): 8-10 часа

Опрема: Планинарски чевли со добар ѓон, планинарски стапчиња, топла облека прилагодена на временските услови, очила за сонце, челна лампа и полн мобилен телефон.

Храна: од ранец, а потребно е да се носи и најмалку 1 литар вода.

Превоз: од Скопје се поаѓа во 04:30 ч. од бензиската станица на Макпетрол на западниот излез.

Цена: 500 ден.

Број на учесници: најмногу 7 (поради условите на теренот, како и достапноста на почетната точка со теренско возило).

Пријавување кајВелимир Граоркоски 071 564 458, veljogr@yahoo.com

 

НАПОМЕНИ:

  • Учесниците во акцијата се должни да ги почитуваат насоките на водачите, во спротивно самите се одговорни за несаканите последици.
  • Еден учесник може да биде исклучен на почетокот или во текот на акцијата доколку се утврди дека не ја поседува соодветната планинарска опрема и не ги почитува препораките на водачот.
  • Сите учесници во групата се движат позади главниот водач (никако пред него), освен кога водачот ќе побара поинаку.
  • Организаторот го заддржува правото за прекинување или промена на акцијата во зависност од врменските услови или некои други неприлики.

Голема Корапска Врата и околни врвови

Целодневна акција на 2 септември, на еден од најубавите предели на планината Кораб – околината на Голема Корапска Врата.

Поаѓање од Скопје во 03.30 од бензинската пумпа на Макпетрол на западниот излез. Доцнењето нема многу да се толерира поради времетраењето на акцијата.

Акцијата е класифицирана како долга и напорна (најмалку 25 км. во должина и најмалку 1800 м. висинска разлика, во најголем дел по тежок терен). Пешачењето започнува од близина на караулата Победа (околу 1400 м.н.в.) околу 3 часа до преминот Голема Корапска Врата (2062 м.н.в.) од каде што може да се појде на некој од околните врвови (Радомирски Врв – 2716 м.н.в. и оддалечен 2 часа од преминот, Зиберова Кула – 2377 м.н.в. со 1 час оддалеченост, Бел Врв – 2532 м.н.в. со 1.5 час оддалеченост, Голем Кораб – 2764 м.н.в. со 3 часа оддалеченост итн). Приоритет ќе има Радомирски Врв и евентуално уште еден од низата врвови над 2700 м.н.в. што гравитираат кон Голем Кораб, но доколку водачите увидат дека е тоа преголем залак за групата, ќе биде посетен еден од другите поблиски и попристапни врвови. Враќањето е планирано да се одвива преку главната патека што се користи за искачување на Голем Кораб од караулата Победа. Вкупното времетраење на акцијата во зависност од движењето и од посетените места ќе биде помеѓу 10 и 13 часа.

За повеќе детали, погледнете ги извештаите од претходните акции што ПСД Макпетрол ги организираше на тој предел во периодот помеѓу 2011 и 2016 година.

Учесниците треба да се добро подготвени за подолго движење по беспатје бидејќи конфигурацијата на теренот е таква што не дозволува патеките да бидат во добра состојба. Заради поголема безбедност, бројот на учесници е ограничен на 14.

 

ПОТСЕТУВАЊЕ ЗА:

– кондури – соодветни кондури за движење по стрмен и карпест терен;

– горна облека – соодветна за искачување на врвови над 2500 м.н.в. во летни услови (да се има предвид дека не ретко на овој терен среде лето и покрај идеална прогноза, се случува да заврне снег и температурата да биде негативна);

– вода – при движењето ќе се наиде на неколку извори, но поради должината подобро е да се понесе барем 1,5 литри вода;

– лична карта или пасош – можна е контрола поради мало навлегување на територијата на Република Албанија и поради тоа што следниот викенд се одржува традиционалното искачување на Голем Кораб по повод денот на независноста на Македонија;

– цена – 500 денари.

 

ПРИЈАВУВАЊЕ (најдоцна до 31 август) кај:

Велимир Граоркоски  071 564-458 / veljogr@yahoo.com

 

ВОДАЧИТЕ ГО ЗАДРЖУВААТ ПРАВОТО:

  • УШТЕ НА ПОЧЕТОКОТ ИЛИ ВО ТЕКОТ НА АКЦИЈАТА ДА ГИ ИСКЛУЧАТ ПРИЈАВЕНИТЕ ЗА КОИ ШТО СМЕТААТ ДЕКА НЕ ГИ ИСПОЛНУВААТ УСЛОВИТЕ НА АКЦИЈАТА ИЛИ ПАК ГО ЗАГРОЗУВААТ НЕЈЗИНОТО ОДВИВАЊЕ (СЕ УТВРДУВА ПРИ ОЦЕНА НА ОДНЕСУВАЊЕТО, КАКО И ПРИ ПРОВЕРКА НА ЛИЧНАТА ОПРЕМА И ТОВАР);
  • ДА ЈА ОТКАЖАТ ИЛИ ДА ГО ИЗМЕНАТ ТЕКОТ НА АКЦИЈАТА ДОКОЛКУ ИМААТ СИЛНИ ПРИЧИНИ ЗА ТОА.

 

УЧЕСНИЦИТЕ НА АКЦИЈАТА СЕ ДОЛЖНИ:

  • ДА ГИ СЛУШААТ ПРЕПОРАКИТЕ НА ВОДАЧИТЕ;
  • ДА ГИ ИЗВЕСТАТ ВОДАЧИТЕ ДОКОЛКУ МИСЛАТ ДЕКА НИВНАТА ПСИХОФИЗИЧКА СОСТОЈБА МОЖЕ НЕГАТИВНО ДА ВЛИЈАЕ ВРЗ АКЦИЈАТА.
Кривошија

Кривошија

Ако според многумина Шар Планина е најубава планина во Македонија, тогаш поширокиот реон на Лешница е нејзин најубав дел. И ако веќе одиме во длабочина, кога веќе се тврди дека Лешница е срцето на Шара, тогаш областа Кривошија е епицентарот на природното богатство на тој реон. ПСД Макпетрол во не така далечното минато многупати организираше акции на Кривошија, најпрво од Попова Шапка како почетна точка, а потоа и од селото Бозовце (околу 1300 м.н.в.) кое се покажа дека е поблиска и поедноставна варијанта (поради асфалтниот пат). За тие акции претходно беа објавувани извештаи, но поминатите предели заслужуваат да бидат објавени уште еднаш, поготово што беа опфатени во само еден ден, а и со цел да се поттикне нивната заштита од страна на заканите од човечка страна (во прв план сечењето на шумата и менувањето на водните текови). (more…)